logo
 Naves de Llanes (Asturies)    La Páxina de Naves 
Beón
Localización:
La sablera Beón (San Antolín en castellán) allúgase a escasos 500 metros del pueblu de Naves, nel conceyu de Llanes, y nos arredores de les tamién magnífiques playes de Torimbia y Gulpiyuri.

Descripción:
Ye l'arenal más grande del conceyu de Llanes y un de los más estensos d'Asturies, con más de 1,2 kilómetros de llonxitú y 150.000 metros cuadraos de superficie na baxamar, que l'altamar llega a cubrir por enteru. Nella desemboca a la mar el ríu Beón, más conocíu n'otres zones como ríu Las Cabras. Tien perbonos accesos y servicios, yá qu'avancen xunta ella l'autovía del Cantábricu (A-8, antigua N-634) y la carretera comarcal que xune Llanes y Ribesella (AS-263). El llugar ufierta bones condiciones pala práctica del surf y del parapente. La sablera aprovéchase tamién pala recoyida del ocle (algues marines), orilláu peles marees vives de la seronda, y pala pesca de l'angula, que pola so color y el so elleváu preciu ye conocida como "oru blancu".

Características:
• Ocupación: Alta. • Llonxitú aprosimada: 2.000 metros. • Accesos: Rodaos.
• Servicios: Tres chigres de temporada. • Aparcamientu: Sí. • Socorrismu: Sí.
• Material: Sable finu y grava. • Color: Blanquecín. • Forma: Rectilinia.
• Desembocadura fluvial: Ríu Beón. • Entornu: Rural / agrícola, con dellos servicios.
• Tipu de sablera: Ventosa. Folaxe fuerte. • Peligrosidá: Alta.
• Atractivos: Monumentales (monasteriu románicu de Santolín de Beón, del sieglu XII), recreativos, pesqueros y deportivos (surf).

Accesos:
L'autovía del Cantábricu (A-8) y la carretera Llanes-Ribesella (AS-263) avancen xunta la playa Beón. P'allegar a ella hai que desviase en Naves pela AS-263, que conduz derechamente a la zona d'aparcamientu, na parte más recoyida de la sablera. Allegando dende Llanes en dirección a Uviéu esiste la posibilidá d'almirar la playa y el so entornu costeru dende un mirador y una pequeña área recreativa, asitiaes xusto enriba l'arenal. Ye un cuadru que merez la pena si'l día ta claru, o con temporal, cuando la mar bate con fuercia nos cantiles y se formen impresionantes foles que dan llugar, percerca de Beón, a dellos bufones: oquedaes ñaturales de la peña peles que l'agua surde en forma de chorru, casi vaporizada pola presión.
ver semeyes de beón